തിരുവനന്തപുരം: സംസ്ഥാനത്തെ ഐഎഎസ് ഉദ്യോഗസ്ഥരിൽ വലിയ ചലനം സൃഷ്ടിച്ച കേസിൽ സസ്പെൻഷൻ നടപടികൾ. വ്യവസായ വകുപ്പ് ഡയറക്ടർ കെ. ഗോപാലകൃഷ്ണനും അഗ്രോ ഇൻഡസ്ട്രീസ് ഡയറക്ടർ എന്. പ്രശാന്തിനും സസ്പെൻഷൻ. അഡീഷണൽ ചീഫ് സെക്രട്ടറി എ. ജയതിലകിനെതിരായ പരസ്യപ്രതികരണമാണ് പ്രശാന്തിനെതിരെ നടപടിക്ക് കാരണമെന്നാണ് ചീഫ് സെക്രട്ടറി അറിയിച്ചത്. അതേസമയം, ‘മല്ലു ഹിന്ദു’ എന്ന ഹിന്ദു ഐഎഎസ് ഉദ്യോഗസ്ഥർക്ക് മാത്രമായുള്ള വാട്സ്ആപ്പ് ഗ്രൂപ്പ് ആരംഭിച്ചതാണ് ഗോപാലകൃഷ്ണനെതിരായ നടപടിക്ക് അടിസ്ഥാനം.
സമൂഹമാധ്യമങ്ങളിൽ നടത്തിയ പരസ്യപ്രതികരണങ്ങൾ ചട്ടലംഘനമാണെന്ന് ചൂണ്ടിക്കാട്ടിയ ചീഫ് സെക്രട്ടറി ശാരദ മുരളീധരൻ, ഇന്ന് മുഖ്യമന്ത്രിക്ക് സമർപ്പിച്ച റിപ്പോർട്ടിലാണ് നടപടിയുടെ നിർണായക കാരണങ്ങൾ വിവരിച്ചത്.
അതേസമയം, ഗോപാലകൃഷ്ണനിൽ നിന്ന് വിശദീകരണം തേടിയെങ്കിലും അത് തൃപ്തികരമല്ലെന്ന് ചീഫ് സെക്രട്ടറി ചൂണ്ടിക്കാട്ടി. അതിനിടെ, തിരുവനന്തപുരം സിറ്റി പൊലീസ് കമ്മീഷണർ സമർപ്പിച്ച റിപ്പോർട്ടിൽ ഗോപാലകൃഷ്ണന്റെ നടപടി സംശയാസ്പദമാണെന്ന് ഡിജിപി ചൂണ്ടിക്കാട്ടി.
