കൊച്ചി: വിഴിഞ്ഞം തുറമുഖത്തിനെതിരായ സമരങ്ങൾക്ക് ധനസഹായം നൽകിയെന്ന കേന്ദ്ര ഏജൻസികളുടെ ആരോപണത്തെ തുടർന്ന് രണ്ട് സന്നദ്ധ സംഘടനകളുടെ വിദേശ സംഭാവന നിയന്ത്രണ നിയമം (FCRA) പ്രകാരമുള്ള രജിസ്ട്രേഷൻ പുതുക്കൽ നിഷേധിച്ച കേന്ദ്രസർക്കാർ നടപടി കേരള ഹൈക്കോടതി റദ്ദാക്കി.
ഒരു പ്രതിഷേധത്തിന് സാമ്പത്തിക സഹായം നൽകുന്നത് വിദേശ ഫണ്ട് വഴിതിരിച്ചുവിട്ടതായി കണക്കാക്കാനാകില്ലെന്ന് കോടതി വ്യക്തമാക്കി.
ഭരണഘടന പ്രതിഷേധിക്കാനുള്ള അവകാശം ഉറപ്പുനൽകുന്നുണ്ടെന്നും അതിനാൽ പ്രതിഷേധക്കാർക്ക് സാമ്പത്തിക സഹായം നൽകുന്നത് പൊതുതാൽപര്യത്തിന് വിരുദ്ധമായതോ അഭികാമ്യമല്ലാത്തതോ ആയ ആവശ്യത്തിനായി വിദേശ ഫണ്ട് വിനിയോഗിച്ചതായി കണക്കാക്കാനാകില്ലെന്നും കോടതി നിരീക്ഷിച്ചു.
FCRAയിലെ സെക്ഷൻ 12(4)(a)(ii)ൽ പറയുന്ന ‘അഭികാമ്യമല്ലാത്ത ഉദ്ദേശ്യം’ എന്ന പദം സർക്കാരിന് അഭികാമ്യമല്ലാത്തതോ രാഷ്ട്രീയ താൽപര്യങ്ങൾക്ക് വിരുദ്ധമായതോ ആയ കാര്യങ്ങളെ സൂചിപ്പിക്കുന്നതായി വ്യാഖ്യാനിക്കാനാകില്ലെന്നും ഹൈക്കോടതി വ്യക്തമാക്കി.
ഭരണഘടനാപരമായി പ്രതിഷേധിക്കാനുള്ള അവകാശം ഉറപ്പുനൽകിയിരിക്കുന്ന സാഹചര്യത്തിൽ, ആ അവകാശം വിനിയോഗിക്കുന്നതിനെ ‘അഭികാമ്യമല്ലാത്ത ഉദ്ദേശ്യം’ എന്നോ പൊതുതാൽപര്യത്തിന് വിരുദ്ധമെന്നോ വിശേഷിപ്പിക്കാനാകില്ലെന്നും കോടതി പറഞ്ഞു.
