തൃശൂർ: 2026ലെ കേന്ദ്ര ബജറ്റിൽ കേരളത്തിന് വലിയ സാമ്പത്തിക നേട്ടമുണ്ടായതായി ബിജെപി ദേശീയ അധ്യക്ഷൻ നിതിൻ നബീൻ പറഞ്ഞു. ബിജെപി ഇന്റലക്ട്വൽ സെൽ സിറ്റി ജില്ലാ കമ്മിറ്റി സംഘടിപ്പിച്ച കേന്ദ്ര ബജറ്റ് ചർച്ചയിൽ സംസാരിക്കുകയായിരുന്നു അദ്ദേഹം. നികുതി വിഹിതമായും ഗ്രാന്റായും കേന്ദ്ര സർക്കാർ കേരളത്തിന് അനുവദിക്കുന്ന തുകയിൽ ഗണ്യമായ വർധനവുണ്ടായതായും, റെയിൽവേ വികസനം, വന്ദേ ഭാരത്–അമൃത് ഭാരത് ട്രെയിനുകൾ ഉൾപ്പെടെ കേരളത്തിന് പ്രത്യേക പരിഗണന നൽകിയതായും നിതിൻ നബീൻ വ്യക്തമാക്കി. കേരളത്തിനുള്ള നികുതി വിഹിതം 33 ശതമാനം വർധിച്ച് ഏകദേശം 8,973 കോടി രൂപയായപ്പോൾ, കേന്ദ്ര ഗ്രാന്റുകൾ 13,000 കോടിയിൽ നിന്ന് 26,000 കോടിയായി ഇരട്ടിയായി.
പ്രധാനമന്ത്രി നരേന്ദ്ര മോദിയുടെ ‘വിഷൻ 2047’ വഴി ഇന്ത്യ ശക്തമായി മുന്നേറുകയാണെന്ന് നിതിൻ നബീൻ പറഞ്ഞു. ആഗോള സാമ്പത്തിക വെല്ലുവിളികൾ നിലനിൽക്കുമ്പോഴും ഇന്ത്യ 7 ശതമാനം വളർച്ചാനിരക്കോടെയും കുറഞ്ഞ പണപ്പെരുപ്പത്തോടെയും മുന്നേറുന്നു. മുൻകാലങ്ങളിൽ ജനസംഖ്യയെ ഭാരമായി കണ്ടപ്പോൾ, മോദിജി 140 കോടി ജനങ്ങളെ രാജ്യത്തിന്റെ വലിയ സമ്പത്തായാണ് കാണുന്നതെന്നും അദ്ദേഹം പറഞ്ഞു. ‘മേക്ക് ഇൻ ഇന്ത്യ’, ‘സ്കിൽ ഇന്ത്യ’, ‘സ്റ്റാർട്ടപ്പ് ഇന്ത്യ’ പദ്ധതികൾ ഫലം കണ്ടതോടെ യുവാക്കൾ തൊഴിൽ തേടുന്നവരിൽ നിന്ന് തൊഴിൽ നൽകുന്നവരായി മാറിയെന്നും അദ്ദേഹം ചൂണ്ടിക്കാട്ടി.
ഇൻഫ്രാസ്ട്രക്ചർ വികസനത്തിന്, പ്രത്യേകിച്ച് റോഡുകൾ, ഗതാഗതം, റെയിൽവേ മേഖലകൾക്ക് 5 ലക്ഷം കോടി രൂപയിലധികം ബജറ്റിൽ വകയിരുത്തിയിട്ടുണ്ട്. ബയോ-ഫാർമ വ്യവസായത്തിന് 10,000 കോടി രൂപയുടെ പിന്തുണയും, ഇലക്ട്രോണിക്സ്–മാനുഫാക്ചറിംഗ് മേഖലകൾക്ക് ശക്തമായ പ്രോത്സാഹനവും നൽകുന്നുവെന്ന് അദ്ദേഹം പറഞ്ഞു. കശുവണ്ടി, കൊക്കോ തുടങ്ങിയ കേരളവുമായി ബന്ധപ്പെട്ട കാർഷിക മേഖലകൾക്കും ബജറ്റിലൂടെ നേട്ടമുണ്ടാകുമെന്നും വ്യക്തമാക്കി.
‘ജൻ ധൻ’ അക്കൗണ്ടുകളും ഡയറക്ട് ബെനിഫിറ്റ് ട്രാൻസ്ഫറും പാവപ്പെട്ടവരുടെ ജീവിതത്തിൽ വിപ്ലവകരമായ മാറ്റമാണ് സൃഷ്ടിച്ചതെന്നും നിതിൻ നബീൻ പറഞ്ഞു. ഇന്ന് ഡൽഹിയിൽ നിന്ന് അയക്കുന്ന പണം ഇടനിലക്കാരില്ലാതെ നേരിട്ട് ഗുണഭോക്താക്കളുടെ അക്കൗണ്ടിലെത്തുന്ന സാഹചര്യമാണുള്ളത്. കേരളത്തിൽ 1.55 കോടി പേർക്ക് ഗരീബ് കല്യാൺ യോജന, 85 ലക്ഷം പേർക്ക് ആയുഷ്മാൻ ഭാരത്, 28 ലക്ഷം കർഷകർക്ക് പിഎം കിസാൻ, കൂടാതെ 10,000ലധികം ജൻ ഔഷധി കേന്ദ്രങ്ങൾ പ്രവർത്തിക്കുന്നതും അദ്ദേഹം വിശദീകരിച്ചു.
കേരളത്തിന് ലോകോത്തര ടൂറിസം കേന്ദ്രമാകാനുള്ള സാധ്യതയുണ്ടെന്നും, എന്നാൽ അഴിമതിയും ഭരണപരാജയങ്ങളും അതിനെ ബാധിക്കുന്നുവെന്നുമാണ് നിതിൻ നബീന്റെ ആരോപണം. ശബരിമല ഉൾപ്പെടെ കേരളത്തിന്റെ സാംസ്കാരിക പൈതൃകം സംരക്ഷിക്കുമെന്നും, തീരദേശ കപ്പൽ ഗതാഗതവും ജലഗതാഗതവും ശക്തിപ്പെടുത്തുമെന്നും അദ്ദേഹം പറഞ്ഞു. നരേന്ദ്ര മോദിയുടെ നേതൃത്വത്തിൽ 2026ൽ കേരളത്തിൽ ബിജെപി സർക്കാർ രൂപീകരിക്കുമെന്നും, 2047ൽ വികസിത ഭാരതത്തിനൊപ്പം വികസിത കേരളം സാക്ഷാത്കരിക്കുമെന്നും നിതിൻ നബീൻ ആത്മവിശ്വാസം പ്രകടിപ്പിച്ചു.
ചർച്ചയിൽ സംസ്ഥാന പ്രസിഡന്റ് രാജീവ് ചന്ദ്രശേഖർ, സംസ്ഥാന ജനറൽ സെക്രട്ടറിമാരായ എ. എസ്. സുരേഷ്, ശോഭ സുരേന്ദ്രൻ, വൈസ് പ്രസിഡന്റ് അഡ്വ. ബി. ഗോപാലകൃഷ്ണൻ, ജില്ലാ പ്രസിഡന്റ് ജസ്റ്റിൻ ജേക്കബ് തുടങ്ങി രാഷ്ട്രീയ, സാമൂഹിക, വ്യവസായ മേഖലകളിലെ നിരവധി പ്രമുഖർ പങ്കെടുത്തു.
