ന്യൂഡൽഹി: പ്രധാനമന്ത്രി നരേന്ദ്ര മോദി സ്വാതന്ത്ര്യദിനത്തിൽ പ്രഖ്യാപിച്ച ‘ശക്തി കി സപ്തധാര’ പ്രവർത്തനതലത്തിൽ നടപ്പാക്കുന്നതിൻ്റെ ഭാഗമായി കേന്ദ്ര കൃഷി-കർഷക ക്ഷേമ, ഗ്രാമവികസന മന്ത്രി ശിവരാജ് സിങ് ചൗഹാൻ്റെ നേതൃത്വത്തിൽ ന്യൂഡൽഹിയിൽ പ്രതിജ്ഞാ പരിപാടി സംഘടിപ്പിച്ചു.
പൂസയിലെ സി. സുബ്രഹ്മണ്യം ഓഡിറ്റോറിയത്തിൽ നടന്ന പരിപാടിയിൽ ഉദ്യോഗസ്ഥർ, ശാസ്ത്രജ്ഞർ, കർഷകർ, ഭക്ഷ്യസംസ്കരണ മേഖലയിലെ പ്രതിനിധികൾ, കയറ്റുമതിക്കാർ, കർഷക ഉൽപാദക സംഘടനകളുടെ (FPO) പ്രതിനിധികൾ എന്നിവർ പങ്കെടുത്തു. വികസിതവും സമ്പന്നവും സ്വയംപര്യാപ്തവും ശാക്തീകരിക്കപ്പെട്ടതുമായ ഇന്ത്യ കെട്ടിപ്പടുക്കുന്നതിനായി എല്ലാവരും കൂട്ടായ പ്രതിജ്ഞയെടുത്തു.
കൃഷിയും ഭക്ഷ്യസംസ്കരണവും ‘ശക്തി കി സപ്തധാര’യുടെ പ്രധാന തൂണുകളാണെന്ന് ചൗഹാൻ പറഞ്ഞു. കാർഷിക ഉൽപാദനം വർധിപ്പിക്കുന്നതിനൊപ്പം ഗുണനിലവാരം, സുരക്ഷ, അന്താരാഷ്ട്ര നിലവാരങ്ങൾ പാലിക്കൽ എന്നിവ ഉറപ്പാക്കണമെന്നും ഇതിലൂടെ ഇന്ത്യൻ കാർഷിക ഉൽപന്നങ്ങൾക്ക് ആഗോള വിപണിയിൽ കൂടുതൽ ശക്തമായ സാന്നിധ്യം ഉറപ്പാക്കാനാകുമെന്നും അദ്ദേഹം വ്യക്തമാക്കി.
ദേശീയ താൽപര്യത്തിന് മുൻഗണന നൽകി പ്രവർത്തിക്കണമെന്നും ഓരോ വകുപ്പും വ്യക്തമായ ലക്ഷ്യങ്ങളും പ്രവർത്തനപദ്ധതികളും തയ്യാറാക്കി ആത്മാർത്ഥതയോടെയും കഠിനാധ്വാനത്തോടെയും നടപ്പാക്കണമെന്നും ചൗഹാൻ ഉദ്യോഗസ്ഥരോട് ആവശ്യപ്പെട്ടു. കർഷകരെയും പാവപ്പെട്ടവരെയും ഗ്രാമീണ സമൂഹത്തെയും സേവിക്കുന്നത് ഭാരത മാതാവിനെ സേവിക്കുന്നതിന് തുല്യമാണെന്നും അദ്ദേഹം പറഞ്ഞു.
