ന്യൂഡൽഹി: ആയുർവേദ ദിനത്തോടനുബന്ധിച്ച് രാജ്യത്തെ ജനങ്ങൾക്ക് പ്രധാനമന്ത്രി നരേന്ദ്ര മോദി ആശംസകൾ നേർന്നു. പരമ്പരാഗത ചികിത്സാരീതികളുടെ കാലാതീതമായ പ്രസക്തി ഉയർത്തിക്കാട്ടിയ പ്രധാനമന്ത്രി, ആയുർവേദം രോഗചികിത്സയ്ക്കുള്ള ഒരു സംവിധാനം മാത്രമല്ലെന്നും ആരോഗ്യകരവും സന്തുലിതവുമായ ജീവിതശൈലി പിന്തുടരുന്നതിനുള്ള ഫലപ്രദമായ മാർഗമാണെന്നും വ്യക്തമാക്കി.
ഇന്ത്യയുടെ സമ്പന്നമായ ആയുർവേദ പാരമ്പര്യത്തെ കൂടുതൽ ശക്തിപ്പെടുത്തുന്നതിനും അതിന്റെ മൂല്യങ്ങൾ ജീവിതത്തിൽ ഉൾക്കൊള്ളുന്നതിനുമുള്ള പ്രതിജ്ഞ കൂടുതൽ ശക്തമാക്കണമെന്ന് അദ്ദേഹം ആഹ്വാനം ചെയ്തു.
ആയുർവേദ ദിനത്തിന്റെ ഭാഗമായി ആയുർവേദത്തിന്റെ സമഗ്രമായ ആരോഗ്യസമീപനത്തെ വ്യക്തമാക്കുന്ന സംസ്കൃത സുഭാഷിതവും പ്രധാനമന്ത്രി പങ്കുവെച്ചു. ശരീരത്തിന്റെയും ജീവിതശൈലിയുടെയും സമതുലിതാവസ്ഥയ്ക്ക് ആയുർവേദം നൽകുന്ന പ്രാധാന്യവും അദ്ദേഹം സന്ദേശത്തിൽ ചൂണ്ടിക്കാട്ടി.
