തൃശൂര്: സംസ്ഥാന ഉപതെരഞ്ഞെടുപ്പുകളില് ഇടതുമുന്നണി പ്രചാരണത്തിന് ഇന്ന് ശക്തമായ തുടക്കം. ചേലക്കര മണ്ഡലത്തിലെ ഇടതു സ്ഥാനാര്ത്ഥി യു.ആര്. പ്രദീപിന് വേണ്ടി ഇന്ന് മുഖ്യമന്ത്രി പിണറായി വിജയൻ പ്രചാരണത്തിനെത്തും. ചേലക്കര മേപ്പാടത്ത് രാവിലെ 10 മണിക്ക് നടക്കുന്ന പ്രദീപിന്റെ തെരഞ്ഞെടുപ്പ് കണ്വെന്ഷന് മുഖ്യമന്ത്രി ഉദ്ഘാടനം ചെയ്യും.
പാലക്കാട്, വയനാട് മണ്ഡലങ്ങളിലെ സ്ഥാനാര്ത്ഥികള്ക്കായും മുഖ്യമന്ത്രി പ്രചാരണത്തിനെത്തും, എങ്കിലും തീയതി ഇതുവരെ നിശ്ചയിച്ചിട്ടില്ല. ചേലക്കരയില് നിന്ന് തുടക്കം കുറിക്കുന്ന പ്രചാരണത്തിലൂടെ ഇടതുമുന്നണി ഉപതെരഞ്ഞെടുപ്പില് ശക്തമായ മുന്നേറ്റം കാഴ്ചവയ്ക്കാനാണ് ഉദ്ദേശിക്കുന്നത്.
പാലക്കാട് മണ്ഡലത്തിലെ പി. സരിന്റെ കണ്വെന്ഷന് ഇന്ന്
പാലക്കാട് എല്ഡിഎഫ് സ്ഥാനാര്ത്ഥി പി. സരിന്റെ തെരഞ്ഞെടുപ്പ് കണ്വെന്ഷന് ഇന്ന് വൈകിട്ട് 4 മണിക്ക് പ്രസന്ന ലക്ഷ്മി ഓഡിറ്റോറിയത്തില് നടക്കും. സി.പി.എം സംസ്ഥാന സെക്രട്ടറി എം.വി. ഗോവിന്ദന് കണ്വെന്ഷന് ഉദ്ഘാടനം ചെയ്യും. കോണ്ഗ്രസ്സ് വിട്ട് ഇടതുപക്ഷത്തിലേക്ക് എത്തിയ സരിന്റെ സ്ഥാനാര്ത്ഥിത്വം ഇടതു മുന്നണിക്ക് വലിയ കരുത്താകും എന്ന് നേതാക്കള് പ്രതീക്ഷിക്കുന്നു.
