തിരുവനന്തപുരം: റോഡ് അപകടങ്ങളിൽ പ്രധാന കാരണം ഉറക്കം എന്നതിനെതിരേ ശക്തമായ മുന്നറിയിപ്പുമായി മോട്ടോർ വാഹന വകുപ്പ്. ഉറക്കത്തിൻ്റെ ലക്ഷണം വന്നു കഴിഞ്ഞാൽ, ലക്ഷ്യം എത്ര അടുത്താലും വാഹനം ഓടിച്ച് മുന്നോട്ട് പോകാൻ റിസ്ക് എടുക്കരുത് എന്നാണ് മുന്നറിയിപ്പ്. സുരക്ഷിതമായി വാഹനം പാർക്ക് ചെയ്ത് അല്പസമയമെങ്കിലും ഉറങ്ങി, അതിനുശേഷം യാത്ര തുടരുക എന്നതാണ് സുരക്ഷിത മാർഗം.
വ്യക്തിയുടെ ബയോളജിക്കൽ ക്ലോക്കിന്റെ സ്വാഭാവിക പ്രവർത്തനം കാരണം, ഉറങ്ങേണ്ട സമയത്ത് മനസ്സും ശരീരവും അവശതയിലാകുമെന്നു മോട്ടോർ വാഹന വകുപ്പിന്റെ ഫെയ്സ്ബുക്ക് പോസ്റ്റിൽ പറയുന്നു. ദിവസവും രാത്രിയും നീണ്ട ഡ്രൈവിംഗിന് ശേഷം ഉണ്ടാകുന്ന അമിതമായ തളർച്ച അപകടം ക്ഷണിക്കാം.
പകലും രാത്രിയും വിജനമായ റോഡുകളിൽ ഡ്രൈവർ ഉറങ്ങിപ്പോകുന്ന സാഹചര്യം ഉണ്ടാകാം. ഉറങ്ങുന്ന സമയത്ത് വാഹന നിയന്ത്രണം നഷ്ടപ്പെടുന്നതിന്റെ തീവ്രത കൂടുതലായിരിക്കും, കാരണം ഡ്രൈവർക്ക് വാഹനം നിർത്താനുള്ള ശ്രമം പോലും ചെയ്യാൻ സാധിക്കില്ല. ഇത്തരം അപകടങ്ങൾ ഫുൾ സ്പീഡിലായിരിക്കും ഇടിക്കുന്നത്. സുരക്ഷ ഉറപ്പാക്കാൻ, ഉറക്കത്തെ അവഗണിക്കാതെ താൽക്കാലിക വിശ്രമം എടുക്കുന്നത് അത്യാവശ്യം എന്നാണ് സർക്കാർ നിർദ്ദേശം.
