ന്യൂഡൽഹി: സാധാരണയായി വേനൽക്കാലം കടുക്കുമ്പോൾ റിപ്പോർട്ട് ചെയ്യാറുള്ള എച്ച്3എൻ2 ഇൻഫ്ലുവൻസ കേസുകൾ ഇത്തവണ നേരത്തേ തന്നെ വർധിക്കുന്നതിൽ ആശങ്ക പ്രകടിപ്പിച്ച് ആരോഗ്യവിദഗ്ധർ. രാജ്യത്തിന്റെ വിവിധ ഭാഗങ്ങളിൽ പനിയും ശ്വാസകോശ സംബന്ധമായ അസുഖങ്ങളും ബാധിക്കുന്നവരുടെ എണ്ണം ഉയരുകയാണ്. കാലാവസ്ഥാ വ്യതിയാനവും അന്തരീക്ഷ മലിനീകരണവും രോഗവ്യാപനത്തിന് പ്രധാന കാരണങ്ങളായി ഡോക്ടർമാർ ചൂണ്ടിക്കാണിക്കുന്നു. ഇൻഫ്ലുവൻസ എ വൈറസിന്റെ ഉപവിഭാഗമായ എച്ച്3എൻ2 ബാധിച്ചവരിൽ മറ്റ് പനികളേക്കാൾ ലക്ഷണങ്ങൾ കൂടുതൽ ദിവസങ്ങളോളം തുടരുന്നതാണ് ഈ ഘട്ടത്തിലെ പ്രത്യേകത.
വിട്ടുമാറാത്ത കഠിന പനി, നിർത്താതെയുള്ള ചുമയും തൊണ്ടവേദനയും, ശരീരവേദന, കടുത്ത ക്ഷീണം എന്നിവയ്ക്കൊപ്പം ചിലരിൽ ഛർദ്ദി, വയറിളക്കം തുടങ്ങിയ ലക്ഷണങ്ങളും കാണപ്പെടുന്നുണ്ട്. രോഗവ്യാപനം തടയാൻ തിരക്കേറിയ ഇടങ്ങളിൽ മാസ്ക് ധരിക്കുക, കൈകൾ ഇടയ്ക്കിടെ സോപ്പിട്ട് കഴുകുകയോ സാനിറ്റൈസർ ഉപയോഗിക്കുകയോ ചെയ്യുക എന്നിവ നിർബന്ധമാണെന്ന് ആരോഗ്യവിദഗ്ധർ പറയുന്നു. നിർജ്ജലീകരണം ഒഴിവാക്കാൻ ധാരാളം വെള്ളവും പോഷകഗുണമുള്ള പാനീയങ്ങളും കുടിക്കണമെന്നും, രോഗലക്ഷണങ്ങൾ കണ്ടാൽ മറ്റുള്ളവരുമായി സമ്പർക്കം ഒഴിവാക്കി വിശ്രമിക്കണമെന്നും നിർദേശിക്കുന്നു. ഡോക്ടറുടെ നിർദ്ദേശമില്ലാതെ ആന്റിബയോട്ടിക്കുകൾ കഴിക്കരുതെന്നും കുട്ടികൾ, പ്രായമായവർ, മറ്റ് ഗുരുതര രോഗങ്ങളുള്ളവർ എന്നിവർ പ്രത്യേക ജാഗ്രത പാലിക്കണമെന്നും ആരോഗ്യ മന്ത്രാലയം അറിയിച്ചു.
