ന്യൂഡൽഹി: ജുഡീഷ്യൽ സർവീസിലേക്ക് പ്രവേശിക്കുന്നതിന് മുൻപ് നിയമരംഗത്ത് പ്രാക്ടീസ് ചെയ്തിരിക്കണമെന്ന നിബന്ധന സുപ്രീം കോടതി ശരിവച്ചു. അതേസമയം, യുവ അഭിഭാഷകർക്കും നിയമ ബിരുദധാരികൾക്കും പരിമിതമായ ഇളവും അനുവദിച്ചിട്ടുണ്ട്.
2025 മേയ് 25 മുതൽ 2027 മാർച്ച് 31 വരെ പുറപ്പെടുവിക്കുന്ന വിജ്ഞാപനങ്ങൾ പ്രകാരം അപേക്ഷിക്കുന്നവർക്ക് മുൻപരിചയമില്ലാതെയും പരീക്ഷ എഴുതാം. തിരഞ്ഞെടുക്കപ്പെടുന്നവർ ഒരു വർഷത്തെ ജുഡീഷ്യൽ അക്കാദമി പരിശീലനവും തുടർന്ന് ഒരു വർഷത്തെ ക്ലർക്ക്ഷിപ്പും പൂർത്തിയാക്കണം.
2027 ഏപ്രിൽ 1 മുതൽ സിവിൽ ജഡ്ജ് (ജൂനിയർ ഡിവിഷൻ) പരീക്ഷയ്ക്ക് അപേക്ഷിക്കുന്നവർക്ക് കുറഞ്ഞത് ഒരു വർഷത്തെ സജീവ നിയമ പ്രാക്ടീസ് നിർബന്ധമായിരിക്കും. ഇത് പ്രാക്ടീസ് സർട്ടിഫിക്കറ്റ് വഴി തെളിയിക്കണമെന്നും കോടതി വ്യക്തമാക്കി.
ജുഡീഷ്യറിയിൽ പ്രവേശിക്കുന്നതിന് മുമ്പുള്ള നിയമരംഗത്തെ പരിചയം ജുഡീഷ്യൽ സർവീസുമായി യുക്തിസഹമായി ബന്ധപ്പെട്ടിരിക്കുന്നുവെന്നും കോടതി നിരീക്ഷിച്ചു. ചീഫ് ജസ്റ്റിസ് സൂര്യകാന്ത്, ജസ്റ്റിസ് ഓഗസ്റ്റ് ജോർജ് മസീഹ്, ജസ്റ്റിസ് കെ. വിനോദ് ചന്ദ്രൻ എന്നിവരടങ്ങിയ ബെഞ്ചാണ് വിധി പ്രസ്താവിച്ചത്. ജസ്റ്റിസ് കെ. വിനോദ് ചന്ദ്രൻ വിയോജിപ്പ് രേഖപ്പെടുത്തി.
