ന്യൂഡൽഹി: ഗ്രേറ്റ് നിക്കോബാർ ദ്വീപിലെ വൻ അടിസ്ഥാന സൗകര്യ പദ്ധതിക്കായി സമ്മതം നേടുന്നതിൽ വനാവകാശ നിയമം ലംഘിച്ചെന്നാരോപിച്ചുള്ള പൊതുതാൽപര്യ ഹർജികളുടെ (PIL) പരിപാലനക്ഷമത അംഗീകരിച്ച കൽക്കട്ട ഹൈക്കോടതി ഉത്തരവിനെതിരെ കേന്ദ്രം നൽകിയ ഹർജി സുപ്രീംകോടതി തള്ളി.
ചീഫ് ജസ്റ്റിസ് സൂര്യകാന്ത് അധ്യക്ഷനായ ജസ്റ്റിസുമാരായ ജോയ്മാല്യ ബാഗ്ചി, വി. മോഹന എന്നിവരടങ്ങിയ ബെഞ്ചാണ് ഹർജി തള്ളിയത്. വിഷയം ഹൈക്കോടതിയുടെ പരിഗണനയിലാണെന്നും നവംബർ 25, 26 തീയതികളിൽ വാദം കേൾക്കാൻ നിശ്ചയിച്ചിട്ടുണ്ടെന്നും ബെഞ്ച് ചൂണ്ടിക്കാട്ടി.
നിശ്ചയിച്ച തീയതികളിൽ നിലവിലുള്ള എല്ലാ ഹർജികളും ഉൾപ്പെടെ വിഷയം പരിഗണിക്കണമെന്ന് സുപ്രീംകോടതി ഹൈക്കോടതിയോട് നിർദേശിച്ചു.
