ന്യൂഡൽഹി: ആർഎസ്എസിൻ്റെ നൂറുവർഷത്തെ സേവനപ്രവർത്തനങ്ങൾ പ്രതിപാദിക്കുന്ന A Century of Service – The RSS in 100 Acts of Seva എന്ന പുസ്തകം ഉപരാഷ്ട്രപതി സി. പി. രാധാകൃഷ്ണൻ ന്യൂഡൽഹിയിലെ ഉപരാഷ്ട്രപതി ഭവനിൽ പ്രകാശനം ചെയ്തു.
തെലങ്കാന മുൻ ഗവർണറും പുതുച്ചേരി മുൻ ലെഫ്റ്റനൻ്റ് ഗവർണറുമായ ഡോ. തമിഴിസൈ സൗന്ദരരാജനാണ് പുസ്തകത്തിൻ്റെ രചയിതാവ്.
ആർഎസ്എസ് നടത്തിയ സാമൂഹിക സേവനങ്ങളും രാഷ്ട്രനിർമാണത്തിലെ സംഭാവനകളും പുസ്തകം രേഖപ്പെടുത്തുന്നതായി ഉപരാഷ്ട്രപതി പറഞ്ഞു. പൊതുസേവന പ്രവർത്തനങ്ങൾ രേഖപ്പെടുത്തി സൂക്ഷിക്കേണ്ടതിൻ്റെ പ്രാധാന്യവും അദ്ദേഹം ചൂണ്ടിക്കാട്ടി. കോവിഡ് മഹാമാരിക്കാലത്ത് ആർഎസ്എസ് പ്രവർത്തകർ നൽകിയ സഹായങ്ങളെ കുറിച്ചും അദ്ദേഹം അനുസ്മരിച്ചു.
കേന്ദ്ര വാർത്താവിതരണ പ്രക്ഷേപണ, പാർലമെൻ്ററികാര്യ സഹമന്ത്രി എൽ. മുരുകൻ, പുതുച്ചേരി ആഭ്യന്തരമന്ത്രി എ. നമശ്ശിവായം, ഡോ. തമിഴിസൈ സൗന്ദരരാജൻ എന്നിവർ ചടങ്ങിൽ പങ്കെടുത്തു.
