ന്യൂഡൽഹി: കോക്ക്റോച്ച് ജനതാ പാർട്ടിയുടെ (സി.ജെ.പി) പ്രതിഷേധത്തിന് മുന്നോടിയായി ദേശീയ തലസ്ഥാനത്ത് കനത്ത സുരക്ഷ ഏർപ്പെടുത്തി. പ്രധാന റോഡുകളിലും കവലകളിലും ഒന്നിലധികം നിരകളിലായി ബാരിക്കേഡുകൾ സ്ഥാപിക്കുകയും പൊലീസ്, അർധസൈനിക വിഭാഗങ്ങൾ ഉൾപ്പെടെയുള്ള സുരക്ഷാ ഉദ്യോഗസ്ഥരെ വിന്യസിക്കുകയും ചെയ്തിട്ടുണ്ട്.
പ്രതിഷേധങ്ങൾക്കായി നിശ്ചയിച്ചിട്ടുള്ള ജന്തർ മന്തർ കനത്ത സുരക്ഷാവലയത്തിലായിരിക്കുകയാണ്. ഉച്ചഭാഷിണികളിലൂടെ മുന്നറിയിപ്പുകൾ നൽകിയതിനു പുറമെ പ്രധാന കവലകളിലും റോഡുകളിലും സുരക്ഷാ പരിശോധനകൾ ശക്തമാക്കി.
പട്ടേൽ ചൗക്ക് റൗണ്ട്എബൗട്ടിലും വൻ പൊലീസ് സന്നാഹത്തെ വിന്യസിച്ചു. അതേസമയം, അതിർത്തി സുരക്ഷാ സേന (ബി.എസ്.എഫ്), റാപ്പിഡ് ആക്ഷൻ ഫോഴ്സ് (ആർ.എ.എഫ്) തുടങ്ങിയ അർധസൈനിക വിഭാഗങ്ങളിലെ ഉദ്യോഗസ്ഥരും ഡൽഹി പൊലീസിനൊപ്പം സുരക്ഷാ ക്രമീകരണങ്ങളുടെ ഭാഗമായി അണിനിരന്നു.
റൈഫിളുകളും തന്ത്രപ്രധാനമായ സുരക്ഷാ ഉപകരണങ്ങളും വലിയ ബാഗുകളും കൈവശമുണ്ടായിരുന്ന ഉദ്യോഗസ്ഥർ പാർലമെന്റ് സ്ട്രീറ്റ് പൊലീസ് സ്റ്റേഷന് സമീപം നിലയുറപ്പിച്ചിരിക്കുകയാണ്.
പ്രതിഷേധത്തിനിടെ ക്രമസമാധാനം ഉറപ്പാക്കുന്നതിനും അനിഷ്ട സംഭവങ്ങൾ ഒഴിവാക്കുന്നതിനുമായാണ് നഗരത്തിൽ സുരക്ഷ ശക്തമാക്കിയത്.
