അറ്റ്‌ലാന്റ: അമേരിക്കൻ ഇടക്കാല തിരഞ്ഞെടുപ്പിൽ ജോർജിയയിൽ വീണ്ടും വിജയിച്ച് ഡെമോക്രാറ്റിക് പാർട്ടി സെനറ്റർ ജോൺ ഒസോഫ്. റിപ്പബ്ലിക്കൻ സ്ഥാനാർത്ഥിയും പ്രസിഡൻ്റ് ഡൊണാൾഡ് ട്രംപിൻ്റെ പിന്തുണയുള്ള മൈക്ക് കോളിൻസിനെയാണ് ഒസോഫ് പരാജയപ്പെടുത്തിയത്.
വിജയത്തിന് പിന്നാലെ അറ്റ്‌ലാൻ്റയിൽ നടത്തിയ പ്രസംഗത്തിൽ ട്രംപിനെതിരെ രൂക്ഷ വിമർശനവുമായി ഒസോഫ് രംഗത്തെത്തി. പ്രസിഡൻ്റിൻ്റെ ‘അധാർമികത, അഴിമതി, കഴിവില്ലായ്മ’ എന്നിവ വോട്ടർമാർ തള്ളിക്കളഞ്ഞുവെന്ന് അദ്ദേഹം പറഞ്ഞു. രാജ്യം ഇപ്പോഴും ഗുരുതരമായ പ്രതിസന്ധികളിലൂടെയാണ് കടന്നുപോകുന്നതെന്നും ഒസോഫ് കൂട്ടിച്ചേർത്തു.
കോർപ്പറേറ്റ് മേഖലയിലെ അമിത സ്വാധീനം, വർധിച്ചുവരുന്ന ആരോഗ്യപരിപാലന ചെലവുകൾ, പരിസ്ഥിതി മലിനീകരണം, അന്താരാഷ്ട്ര തലത്തിൽ അമേരിക്കയുടെ സ്വാധീനം കുറയുന്നത് തുടങ്ങിയ വിഷയങ്ങളും അദ്ദേഹം പ്രസംഗത്തിൽ ഉന്നയിച്ചു. തൻ്റെ വിജയത്തിന് പിന്തുണ നൽകിയ സ്വതന്ത്ര വോട്ടർമാർക്കും റിപ്പബ്ലിക്കൻ പാർട്ടി അനുഭാവികൾക്കും അദ്ദേഹം നന്ദി അറിയിച്ചു.
ജോർജിയയുടെ ഗവർണറായി തിരഞ്ഞെടുക്കപ്പെട്ട കീഷ ലാൻസ് ബോട്ടംസിനെയും ഒസോഫ് അഭിനന്ദിച്ചു. സംസ്ഥാനത്തിൻ്റെ ചരിത്രത്തിൽ ഗവർണറായി തിരഞ്ഞെടുക്കപ്പെടുന്ന ആദ്യ വനിതയാണ് ബോട്ടംസ്.
അതേസമയം, ഇടക്കാല തിരഞ്ഞെടുപ്പിൽ യുഎസ് ജനപ്രതിനിധി സഭയിലും സെനറ്റിലും ഡെമോക്രാറ്റുകൾ ഭൂരിപക്ഷം നേടിയതായും റിപ്പോർട്ടുകളുണ്ട്. ഇത് ട്രംപിനും റിപ്പബ്ലിക്കൻ പാർട്ടിക്കും വലിയ തിരഞ്ഞെടുപ്പ് തിരിച്ചടിയായി മാറിയിരിക്കുകയാണ്.
