തിരുവനന്തപുരം: സീരിയലുകൾ എൻഡോസൾഫാനേക്കാൾ വിഷലിപ്തമാണെന്ന് പറഞ്ഞ കേരള ചലച്ചിത്ര അക്കാദമി വൈസ് ചെയർമാൻ പ്രേംകുമാറിന്റെ പരാമർശം പിൻവലിക്കണമെന്ന് ആവശ്യപ്പെട്ട് ഗണേഷ് കുമാറും ആത്മയും രംഗത്ത്. സീരിയൽ മേഖലക്കായി പ്രേംകുമാർ എന്ത് ചെയ്തുവെന്നും ചോദിച്ച് ഇരുവരും കുറ്റപ്പെടുത്തി.
പ്രേംകുമാർ കൊച്ചിയിൽ മാധ്യമങ്ങളോട് നടത്തിയ വിവാദ പരാമർശത്തിലാണ് പ്രശ്‌നം ഉയർന്നത്. “ചില സീരിയലുകൾ എൻഡോസൾഫാൻ പോലെ മാരകമാണെന്നും സീരിയലുകൾക്ക് സെൻസറിങ്ങ് വേണമെന്നും” അദ്ദേഹം അഭിപ്രായപ്പെട്ടിരുന്നു.
“സിനിമയും സീരിയലും ഒരു വലിയ ജനസമൂഹത്തെ സ്വാധീനിക്കുന്നു. കല സൃഷ്ടിക്കുന്നവർക്ക് ഇത് പാളിപ്പോയാൽ സമൂഹത്തെ അപചയത്തിലേക്ക് നയിക്കാമെന്ന തിരിച്ചറിവ് ഉണ്ടാകണം. എല്ലാ സീരിയലുകളെയും അടച്ചാക്ഷേപിക്കുകയല്ല എന്റെ ഉദ്ദേശ്യം. കലാകാരൻമാർക്ക് അതിരുകളില്ലാത്ത ആവിഷ്കാരസ്വാതന്ത്ര്യം വേണം. എന്നാൽ, കുറച്ച് ഉത്തരവാദിത്വവും ഉണ്ടായിരിക്കണം,” പ്രേംകുമാർ വിശദീകരിച്ചു.
ഇന്നത്തെ ടെലിവിഷൻ സീരിയലുകൾ വളരുന്ന തലമുറയ്ക്ക് തെറ്റായ കാഴ്ചപ്പാട് നൽകുന്നുവെന്ന് അദ്ദേഹം ചൂണ്ടിക്കാട്ടി. “ഇതാണ് ജീവിതം എന്ന തെറ്റായ ധാരണയും അപകടകരമായ ദൃശ്യഭാവങ്ങളും കുട്ടികളിൽ വളരുന്നു,” അദ്ദേഹം അഭിപ്രായപ്പെട്ടു.
ഗണേഷ് കുമാറും ആത്മയും പരാമർശം പിൻവലിക്കാൻ ആവശ്യപ്പെട്ടതോടെ, ഇത് സിനിമ-സീരിയൽ മേഖലയിൽ വലിയ ചർച്ചകൾക്ക് വഴി വച്ചിരിക്കുകയാണ്.
