ന്യൂഡൽഹി: പ്രധാനമന്ത്രി നരേന്ദ്ര മോദി ‘മൻ കി ബാത്ത്’ പ്രതിമാസ റേഡിയോ പരിപാടിയുടെ 135-ാം പതിപ്പിലെ പ്രധാന വിശേഷങ്ങൾ പങ്കുവെച്ചു. സുരക്ഷ, സ്വയംപര്യാപ്തത, സാംസ്കാരിക പൈതൃകം, പരിസ്ഥിതി സംരക്ഷണം, രാജ്യത്തിൻ്റെ വിവിധ ഭാഗങ്ങളിൽ നടപ്പാക്കുന്ന മാതൃകാപരമായ ജനകീയ സംരംഭങ്ങൾ എന്നിവയാണ് പരിപാടിയിൽ പ്രധാനമായും ഉൾപ്പെടുത്തിയിട്ടുള്ളത്.
സാമൂഹിക മാധ്യമമായ എക്സിലൂടെ പ്രതികരിച്ച പ്രധാനമന്ത്രി, ദേശീയ സുരക്ഷയും സ്വയംപര്യാപ്തതയും സംബന്ധിച്ചാണ് ഇത്തവണത്തെ ‘മൻ കി ബാത്ത്’ ആരംഭിച്ചതെന്ന് പറഞ്ഞു.
പഴയ സാമൂഹിക ചിന്താഗതികൾ മാറ്റി കരുണയുടെയും സഹവർത്തിത്വത്തിൻ്റെയും മാതൃക കാട്ടിയ അസമിലെ ജനങ്ങളെ അദ്ദേഹം അഭിനന്ദിച്ചു. നാഗാലാൻഡിൽ കായികരംഗത്തെ പ്രോത്സാഹിപ്പിക്കുന്ന രണ്ട് ശ്രദ്ധേയമായ സംരംഭങ്ങളെയും പ്രധാനമന്ത്രി മൻ കി ബാത്തിലൂടെ പ്രശംസിച്ചു.
ബിഹാറിലെ നളന്ദ സർവകലാശാലയും സെൻട്രൽ സംസ്കൃത സർവകലാശാലയും പാരമ്പര്യവും ആധുനികതയും മനോഹരമായി സമന്വയിപ്പിക്കുന്ന മാതൃകയാണെന്നും അദ്ദേഹം ചൂണ്ടിക്കാട്ടി.
ഇന്ത്യൻ സംസ്കാരത്തോടുള്ള താൽപര്യത്തിൻ്റെ ഭാഗമായി വേദമന്ത്രങ്ങൾ ആലപിക്കുന്ന ഡൊമിനിക്കൻ റിപ്പബ്ലിക്കിലെ ‘ബ്രഹ്മകമൽ ഡൊമിനിക്കാന വേദിക് മന്ത്ര ചാൻ്റിംഗ് സംഘത്തിൻ്റെ’ പ്രവർത്തനങ്ങളെയും പ്രധാനമന്ത്രി അഭിനന്ദിച്ചു.
മേഘാലയയിലെ പ്രശസ്തമായ ജീവിക്കുന്ന വേരുപാലങ്ങൾ (Living Root Bridges) സംരക്ഷിക്കുന്നതിൽ അവിടുത്തെ ജനങ്ങൾ നടത്തുന്ന ശ്രമങ്ങളും രാജ്യത്തിന് അഭിമാനകരമാണെന്ന് പ്രധാനമന്ത്രി പറഞ്ഞു.
രാജ്യത്തിൻ്റെ വിവിധ ഭാഗങ്ങളിൽ നിന്നും ലോകത്തിൻ്റെ വിവിധ കോണുകളിൽ നിന്നും ഉയർന്നുവരുന്ന ഇത്തരം മാതൃകാപരമായ പ്രവർത്തനങ്ങൾ ഇന്ത്യയുടെ സമ്പന്നമായ സാംസ്കാരിക പൈതൃകത്തിൻ്റെയും നവോത്ഥാന മനോഭാവത്തിൻ്റെയും രാഷ്ട്രനിർമാണ പ്രതിബദ്ധതയുടെയും തെളിവാണെന്നും അദ്ദേഹം കൂട്ടിച്ചേർത്തു.
