കണ്ണൂർ: തളിപ്പറമ്പിൽ യൂത്ത് കോൺഗ്രസ് നേതാവിന്റെ വീടിന് നേരെ ആക്രമണം. വീടിന്റെ പരിസരത്ത് നിർത്തിയിട്ടിരുന്ന രണ്ട് വാഹനങ്ങളും തകർത്തു. ഡിവൈഎഫ്ഐ പ്രവർത്തകരാണ് ആക്രമണത്തിന് പിന്നിലെന്നാണ് ആരോപണം. സംഭവത്തിൽ പൊലീസ് കേസെടുത്തു. യൂത്ത് കോൺഗ്രസ് നേതാവ് രാഹുൽ വേച്ചിയോട്ടിന്റെ പൂക്കോത്തുനടയിലെ വീടിന് നേരെയാണ് വെള്ളിയാഴ്ച രാത്രി 11 മണിയോടെ ആക്രമണമുണ്ടായതെന്ന് പൊലീസ് പറഞ്ഞു. സംഭവവുമായി ബന്ധപ്പെട്ട് ഡിവൈഎഫ്ഐ നേതാവ് അഖിൽ എം.സി.ക്കും തിരിച്ചറിയാത്ത ഒരാൾക്കുമെതിരെ പൊലീസ് കേസെടുത്തിട്ടുണ്ട്. സംഭവത്തിൽ പൊലീസ് അന്വേഷണം തുടരുകയാണ്.
